Креми за лице и моето искуство со нив

Секојдневната употреба на добра крема за лице е момент на добросостојба и љубов кон самите себе си. Од огромна важност е она што ќе го намачкаме на лицето затоа што од него зависи подобрувањето или влошувањето на состојбата на нашата кожа, појавата на акни и митесери. Во подолжение ќе ви го раскажам моето лично искуство со кремите пред и откако преминав на органската козметика. 

Јас пред 9 години...

Како и поголемиот број на девојки кремите ги бирав според марката, цената и рекламите. Одев во парфимерија и си велев аха ова е евтино сигурно не чини, или оваа марка гарант е супер гледав реклама на телевизија, леле каква и беше кожата на девојката што ја рекламираше...!!! Воопшто не обрнував внимание на состојките во кремата, не ја читав декларацијата на самите креми, верував на волшебните креми кои ветуваа чуда после само 2 нанесувања.

Во минатото (на возраст од 19 -20 години) имав голем проблем со кожата и очајно пробував се и сешто со надеж дека ќе решам се, а всушност од одредени производи состојбата и доста се влошуваше. (а ќе ви објаснам подоцна зошто, бидејки на времето не го знаев тоа).

Е сега, не можам, а и не би било фер да кажам дека проблемот го решив со органските креми,  го решив многу години пред да преминам на органска козметикa и тоа по пат на промена на исхраната. Значи почнав да го чистам телото од внатре и лицето почна да се чисти само од себе. Меѓутоа сега користејќи одредени производи од органско потекло, со екстремно чист состав и добро избалансирани формули успевам да го одржам одличното здравје и максималната влажност на кожата. 

Откако пред 9 години се запознав со органската козметика и природната медицина драстично го променив својот концепт и филозофија за здравјето на самата кожа. Дознав за голем број на состојки кои се сметаат за штетни (во продолжение се ќе споделам со вас). Со текот на годините пробував многубројни производи, експериментирав со голем број на креми со цел да сфатам што е она што најдобро ми прилега. Верувајте ми единствен начин да ја најдете вистинската крема е да пробате повеќе видови на креми. Сите ние сме често научени да прашуваме за совети при изборот на идеална крема да се консултираме со другарките меѓутоа една важна работа е тоа што за мене функционира не мора да значи дека ќе функционира и за другите.

Ајде сега да ви објаснам што всушност сфатив за кремите. По прифаќањето на филозофијата за природното и алтернативната медицина, почнав да правам голем број на истражувања на интернет и лично да се консултирам со експерти од двете страни традиционалната и алтернативната медицина за штетноста на одреден број на состојки во кремите. Во продолжение би сакала да ви напишам само дел од една листа на штетни состојки кои најчесто се употребуваат во кремите и мислење од двете страни за некои од состојките и нивното дејство врз кожата.

Како број еден би сакала да ги спомнам нафтените деривати кои во козметичките производи ќе ги најдете под името: Mineral oil, Petrolatum, Paraffinum liquidum,Vaselina, Paraffina, Microcrystalline Wax. Најнапред да кажеме дека Европската Унија ги класифицираше сите нафтени деривати како канцерогени состојки од 2 класа што значи дека сеуште нема докази за директна поврзаност со формирањето на ракот. Мислењата за нафтените деривати се подвоени: едни сметаат дека не се штетни за кожата а други дека се. Во козметичките препарати главната цел на нафтените деривати е задржување на влажноста на кожата. Значи, кога ќе се намачка на кожата парафинот формира тенок слој, еден вид на заштитен филм кој ја задржува водата во кожата спречувајќи ја на тој начин дехидратацијата на кожата. Меѓутоа, кожата има потреба и да дише. Ако губи премногу вода секако дека се суши тоа е повеќе од сигурно, меѓутоа доколку таа не успее да размени вода со надворешните услови постои ризик да со преголемото задржување на водата на површинскиот слој на кожата се формираат бактерии кои одлично се развиваат во услови на преголема влага и се појавуваат инфекции.

Потоа тука се силиконите односно сите оние состојки кои во кремите завршуваат на (-thicone; -xiloxane; -silanoil) како на пример: Dimethicone, Amodimethicone, Cyclomethicone, Ciclopentasiloxane, Dimethiconol.Да разгледаме некои од најчесто поставуваните прашања за нив.

Дали по состав се слични на нафтените деривати? 

Одговорот е не. Додека парафинот е производ на нафтата силиконот се добива по хемиски пат од силициумот, елемент кој се наоѓа во песокот, кварцот и карпите. По пат на една серија на хемиски процеси и во зависност од начинот на комбинација на самите хемиски елементи се добиваат разни видови на силикони кои се употребуваат во козметичките препарати како кремите, производите за коса и декоративната козметика. 

Дали се добри за кожата? 

Не. Како и парафинот и овие не се дермокомпатибилни. Силиконот нема никаква улога во негата на кожата, Дејството му е да створи заштитен филм (маска) на кожата меѓутоа не ја негува, дури во одредени случаи ја суши уште повеќе. Значи ако кожата ви е сува, силиконот прави еден слој врз неа, на допир изгледа мазна и прекрасна, меѓутоа после неколку миења (доколку не го употребувате повеќе) кожата ќе ви остане сува. Нивната употреба е огромна и во производите за коса (меѓутоа за нив ќе говорам кога ќе пишувам за моето искуство со шампоните и останатите производи за коса). Проблемот е што сеуште нема официјални истражувања и резултати, туку клиничка евиденција на некои дерматолози и сведоштва на пациенти.

На интернет наидов на едно многу интересно интервју со дерматолог, објавено во “Дневник“ во секцијата 24 часа здравје, кое сметам дека треба да го прочитате доколку сакате да дознаете повеќе за сите состојки кои се наоѓаат во поголемиот дел од козметичките производи на пазарот.

http://dnevnik.mk/?ItemID=4971E6CBD730384AAF4F90D5540E7417 

Но, да се вратиме на мене и моето искуството со кремите. Верувајте ми бев и на едната и на другата страна, користев и најпозната козметика која ми ветуваше чудо за два дена, меѓутоа ви тврдам со сигурност дека нема крема која може да даде резултати само од две до три апликации, едноставно не постои. Производот треба да се користи најмалку 2 до 3 недели за да се забележи некое првично дејство. 

Јас лично кога почнав да користам природна козметика на почетокот бев очајна. Верувајте ми, ми се плачеше. Откако ја прекинав љубовта со кремите кои претходно ги користев и ја купив првата природна крема (направив драстичен премин) кожата ми стана сува (а дотогаш имав комбинирана кожа), безживотна, немаше боја, се мислев дали да се откажам или не. Меѓутоа тоа беше вистинската состојба на мојата кожа без никаков слој или заштитен филм кој правеше да изгледа супер мека и прекрасна. Решив да бидам истрајна во мојата намера. Првите резултати дојдоа после месец дена (во текот на тој месец спобудалев) ама издржав и оттогаш по пат на природни препарати успевам да и овозможам на мојата кожа максимална хидратација, а воедно и дозволувам да дише.

Драги мои, што повеќе да кажам освен тоа дека целта на овој пост воопшто не е да ве убедам да го следите мојот пример или да се правам паметна, ниту пак да ви кажувам како треба да ја негувате кожата или да си ги решите проблемите со неа (за тоа постојат специјалисти во таа област), туку да со вас го споделам она што јас го научив и увидов на своја кожа, да се обидам да ви ги дадам сите можни информации што јас досега сум ги открила. Мене некој ми помогна пред 9 години и сега јас сакам да го направам истото со некои од вас. 

Меѓутоа да разјаснам една работа, јас сето ова не го научлив за еден ден и во текот на тие девет години учев постојано и направив еден куп грешки верувајте, пробував и козметика која на пазарот се рекламираше како природна а воопшто не беше. Има голем број на компании кои своите производи ги маскираат  под името природно, а всушност и не се такви. Правев грешки при читање на состојките, а успеав да ги научам постепено работите благодарение на еден органски речник на италијански јазик наречен biodizionario. Го споделувам линкот со сите вас кои се двоумите за некоја состојка и сакате лично да ја проверите www.biodizionario.it . Функционира на следниов начин во празното правоаголниче од левата страна го внесувате името на состојката што ве интересира и кликнувате на “cerca” односно на македонски пребарај. Се појавува зборот кој сте го внеле со едно светло до него кое може да биде црвено, жолто или зелено и изгледа вака:

одлично

прифатливо

Би можело да предизвика проблеми меѓутоа може да му прогледаме низ прсти, пред се ако состојката се наоѓа при крајот на листата на состојки*

Не се препорачува, меѓутоа може да направиме исклучок доколку е единствена лоша состојка во целиот производ и на дното на листата (минимално присуство во целиот производ)**

Не се препорачува, меѓутоа може да направиме исклучок доколку е единствена лоша состојка во целиот производ и на дното на листата (минимално присуство во целиот производ)**

Неприфатливо

Секогаш кога ќе сакате да проверите некој производ а не сте сигурни направете го тоа овде. Органската козметика понекогаш има и високи цени (со оглед на тоа што основните материи за изработка на самиот производ се доста скапи), меѓутоа ако погледнеме на пазарот многу производи кои воопшто не се природни имаат уште повисоки цени, а сепак ги купуваат. Во последно време на светскиот пазар се појавија и голем број на компании (најголемиот дел се германски, француски и италијански) кои нудат органска козметика по пристапни цени (со оглед на големиот пораст на органското земјоделство и конкуренцијата на пазарот) и според мене тоа е за огромен поздрав. Драги мои, јас го кажав она што имав да кажам и изборот останува на вас. Сами одберете што ќе нанесете на вашето лице и како ќе ја негувате вашата кожа.

.

*листа на состојки на еден производ или како што се нарекува Ingredients или, INCI е листа во која се означени сите состојки кои се наоѓаат внатре во производот. Ако една состојка е на повисоко место во листата нејзината застапеност е поголема. Како што се оди кон дното на листата застапеноста на состојките е се поминимална.

**понекогаш може да направиме отстапка кај одредени производи со одлично балансирани формули кои имаат една штетна состојка најчесто конзерванс и на последно место на листата, особено при преминот кон природната козметика.