Пробав за вас: пилинг за тело од бел чај и ѓумбир на La Soy

Ексфолијантите односно пилинзите за тело се неопходен дел од палетата на средства за нега на кожата. Тие ги отвараат порите и ги одстрануваат мртвите клетки од површината на кожата правејќи ја мазна , чиста и подмладена. Повеќе за пилинзите и начините на ексфолиација говорев во http://biodevojka.blogspot.com/2015/02/blog-post.html

LaSoy пилинзите се комплетно природни и регенерирачки, без хемикалии, синтетски адитиви и конзерванси.


На полицата во LaSoy  имаше голем избор на пилинзи, но јас решив да го одберам оној со бел чај и ѓумбир, затоа што ми изгледаше доста интересно и необично (јас обожавам нови и необични комбинации кои не се наоѓаат лесно). Составот на овој пилинг е: морска сол, шеќер, бадемово масло, маслиново масло, масло од гроздови семки, пченични никулци, ѓумбир, зелена глина, лецитин, вит. Е, арома на бел чај и ѓумбир.

Нешто што многу ми се допаѓа во самиот пилинг е што содржи и сол и шеќер, а исто така изборот на маслата е фантастичен. Присуството на морска сол овозможува подобро тонирање, прочистување од токсини, релаксација на мускулите, надомест на минерали и подобра циркулација, додека пак шеќерот со ексфолијацијата дава прекрасна свежина и сјај на кожата. Природните масла како маслиновото, бадемовото и маслото од гроздови семки го надополнуваат нутритивното, навлажнувачко и заштитно дејство врз кожата.
Мирисот на овој пилинг е навистина уникатен и необичен. Има лесна и освежителна арома која ги разгалува сетилата и ја освежува кожата. Зелената глина и ѓумбирот во него придонесуваат за подобра циркулација и верувајте ми тоа се чувствува.

Како и колку често треба да се употребува?

Препорачливо е еднаш неделно, на влажна и чиста кожа. По нанесување на пилингот со кружни движења, нежно се масира целото тело и се остава на кожата околу 3 минути. Потоа се измива. Без разлика на тоа што после пилингот кожата ви е навистина многу мека и мазна, јас сепак препорачувам нанесување на добра хидратанта или хранлива крема за тело која ќе ја задржи влагата во кожата и ќе го продолжи ефектот на мека кожа од пилингот.

Откако ќе го нанесете овој пилинг, прво нешто што забележувате е мекоста на кожата (маслата во него навистина си го прават своето), меѓутоа верувајте ми, она што мене ме фасцинираше е свежината која потоа ја чувствувате. Доколку имате уморни нозе или пак после напорен работен ден си приуштите еден ваков пилинг, веднаш ќе почувствувате подобра циркулација благодарение на ѓумбирот во него. А нема ништо подобро од добар завршеток на напорниот работен ден.

Според мене овој пилнг е фантастичен и состојките во него навистина одлично делуваат на кожата. Топло ви советувам да го пробате доколку и вам ви се допаѓаат необични комбинации и освежителни мириси.

Се надевам дека и оваа рецензија ви беше од корист при изборот на вашиот следен пилинг.

Вие како и секогаш доколку сакате да го споделите своето искуство со начините на ексфолиација и пилинзите кои лично вие ги користите, слободно оставете ваш коментар под текстот.

Вики