Мека и негувана кожа на рацете со заштитниот крем Taiga на Natura Siberica

Здраво драги мои,

рацете претставуваат наша лична карта и се прво нешто што го забележуваме кај другите особено кога сме во директен контакт со истите. Дланките се можеби единствениот дел на телото (заедно со стапалата) кои немаат жлезди кои лажат себум (имаат само потни жлезди) и затоа се најподложни на сушење и честопати страдаат од било какви климатски промени. Честото миење на рацете (нормално во текот на денот фаќаме сѐ и сешто) ја отежнува состојбата, затоа што додатно ги суши.

Рацете се оној дел кој најмногу имаат потреба од интензивна нега со соодветен производ за таа намена, кој не само што ќе ги негува и омекне, туку и ќе ги заштити од надворешните влијанија. Токму за сите вас, во оваа статија ќе ви предложам еден навистина прекрасен производ, комплетно природен, за нега на рацете (а богами и стапалата), односно заштитниот крем на марката Natura Siberica.

Овој крем го користам веќе месец дена за заштита на кожата на рацете, го користам и како маска (ќе ви објаснам подоцна во статијата), а го пробав и како крем за стапала и петици. Во сите три случаи се покажа одличен и можам да кажам дека станува збор за еден универзален производ, кој доколку го земете, ќе може да го користите на многу разни начини и во многу ситуации.

Ајде најнапред да ја разгледаме декларацијата на овој производ и да проговориме околу состојките на истиот.

Ingredients (INCI): Aqua, Coco-Caprylate/ Caprate, Glyceryl Stearate, Cetearyl Alcohol, Octyldodecanol, Caprylic/Capric Triglyceride, Glycerin, Pinus Sibirica Seed Oil, Linum Usitatissimum (Linseed) Seed Oil*, Amaranthus Caudatus Seed Oil*, Pinus Sibirica Seed Oil Polyglyceryl-6 EstersPS, Pinus Sibirica Needle ExtractWH, Abies Sibirica Needle ExtractWH,  Picea Obovata Needle ExtractWH , Crataegus Monogina Flower Water*, Achillea Millefolium Flower Water*, Melissa Officinalis Flower/Leaf/Stem Water*, Spiraea Ulmaria Extract*, Bidens Tripartitа Flower/Leaf/Stem Extract, Althaea Officinalis Root Extract*, Saponaria Officinalis Root Extract*, Arctium Lappa Root Extract*, Tocopherol, Sodium Stearoyl Glutamate, Xanthan Gum, Benzyl Alcohol, Dehydroacetic Acid, Sodium Benzoate, Potassium Sorbate, Parfum.

0% siliconi 0% BHT-BHA
0% oli minerali 0% PEG
0% parabeni 0% EDTA

Од декларацијата може да забележиме дека базата на овој крем не е многу масна, доста е хранлива меѓутоа лесно се впива во кожата на дланките. Според мене ова е тоа што ни е потребно, бидејќи последно нешто што сакаме е откако ќе нанесеме крем за раце три саати да го мачкаме додека да се впие. Секако целта е да се најде хранлив крем кој лесно ќе се впие, а долго ќе трае и заштитува, и откако ќе се нанесе ќе ни дпзволи да продолжиме со секојдневните активности без да се грижиме дека ќе измастиме сѐ околу нас. Ете токму ова би било идеална дефиниција за овој производ.

Има убава комбинација на полесни масла како на пример каприлисот, со глицеринот кој омекнува, потоа масло од ленено семе кое интензивно храни и омекнува, масло од бор и многу сибирски екстракти како: бор, мелиса, слез, кои имаат заштитно дејство врз кожата на рацете и ја подобруваат еластичноста на кожата. Исто така производот содржи и есенцијални аминокиселини и витамин Е.

Структурата на овој производ е многу убава и богата, со средна густина, и како што погоре напоменав воопшто не масти. Потребно е убаво да се размачка, меѓутоа по кратко време кожата го впива производот без да остави масна трага.

Според мене одлична е да се користи во поладниот период особено кога дува многу ветар кој ја суши кожата на рацете (со оглед на тоа што одлично заштитува), меѓутоа и кога е потопло, како заштита од жешкото кое додатно суши, со оглед на тоа што веднаш се впива и не масти. Идеален производ за заштита на кожата на рацете во секое време.

Јас го испробав на три начина и тоа:

- како секојдневен крем за раце: го нанесував по потреба кога излегував надвор, или по миење на рацете доколку ја чувствував кожата малку затегната;

- како ноќна маска: ставав поголема количина на рацете и потоа ставав памучни ракавици. Така спиев и можам да ви кажам дека кожата на рацете наутро беше неверојатно мека и свиленкаста.

- како нега на стапала и петици: овој производ го користев и како нега на стапала, особено навечер. Кога ставав од него на рацете ги мачкав и стапалата, ставав чорапчиња и наутро кожата беше неверојатно мека.

Ете драги мои, се надевам дека и оваа статија ви се допадна и дека ви беше од корист. Доколку сте во потрага по еден производ кој ќе може да го користите на повеќе начини како комплетна заштита на кожата на рацете и стапалата, во тој случај ова е вистинскиот производ за вас. Доаѓа во пакување од 75 мл. и ќе ви трае доста долго, особено ако го користите само како производ за заштита на рацете.

Дали досега сте го пробале овој прекрасен производ и колку сте биле задоволни?

Поздрав
Вики