Диетален домашен сладолед од чоколадо
Здраво драги мои,
во овие жешки денови е те како е убаво да се освежиме со еден прекрасен сладолед. Меѓутоа доколку истиот си го направиме сами дома и тоа без додатен шеќер, радоста е поголема.
Во денешнава статија ќе ви дадам еден навистина лесен рецепт кој ќе го направите за само 10 мин. без никаков апарат за подготвување сладолед. Потребно е само да имате замрзнато овошје при рака.
Сѐ што ви е потребно за да го направите е:
- 3 средно големи банани;
- 3 супени лажици горко какао;
- 1 кафена лажичка какао путер
Најнапред исечете ја бананата на тркалца и ставете ја во замрзнувач најмалку 4 часа (најдобро е ако тоа го сторите претходната вечер и ја оставите цела ноќ).
Утредента во еден блендер ставете ја бананата, додадете го какаото и какао путерот и почнете да ја работите смесата на средна јачина сѐ додека да добиете убава густа смеса.
Ете вашиот сладолед е готов.
Мојот на сликата е малку растопен, затоа што бананите не беа доволно замрзнати (затоа ви велам најмалку 4 саати, а најдобро преку ноќ). Јас ги држев околу 3 ипол и добив структура на пудинг кој беше ладен и многу пријатен и вкусен за јадење. Не го ставив повторно во замрзнувач затоа што блиските беа нетрпеливи да го пробаат.
Вие откако ќе го направите доколку не е доволно смрзнат како сладолед, слободно ставете го уште саат време во замрзнувач. Има прекрасен богат вкус на чоколадо, а бананите даваат благост на производот. Воопшто не е потребно да се додава шеќер.
Доколку сакате сладоледот може да го украсите со свежи малини или да ставите малку џем од малини или јагоди врз него (чоколадото со шумско овошје е најдобра комбинација).
Истиов сладолед може да го направите и со овошје. Наместо какао додадете некое овошје по ваш вкус како јагоди, малини, капини или друго (претходно замрзнато секако) и ставете го во блендер со бананата и какао путерот.
Толку едноставно а толку вкусно. Доколку сакате претходно може да замрзнете поголема количина на банани и да го направите овој сладолед секогаш кога ќе посакате.
Како најчесто вие го подготвувате сладоледот дома?
Поздрав
Вики
Comments
Post a Comment