Салицилна киселина: што е, зошто се користи и како се употребува

Здраво драги мои,

како за прва статија оваа година, се решив да проговорам за една состојка која е присутна во голем број на производи за нега на проблематична кожа, односно салицилната киселина. Со оглед на тоа што е и период на овој вид на производи, се надевам дека информациите кои ќе ви ги преставам ќе ви бидат од корист.

Ќе се обидам детално да ви ја објаснам состојката, нејзиното дејство врз кожата, меѓутоа и ќе ви дадам совети како правилно да го изберете производот (крем, тоник, серум) и како правилно да го користите.

Што е всушност салицилната киселина?

Салицилната киселина потекнува од терминот “salix“ кој латинските народи го користеле како име за врбата со оглед на тоа што за првпат оваа состојка била добиена од еден сложен јаглен хидрат кој се наоѓа токму во кората на врбата. Во денешно време истата оваа состојка може да се добие и во лабораториите, така да тешко е да се одреди кој вид на салицилна киселина е користена во еден козметички производ, доколку тоа не е назначено. Спаѓа во групата на Бета хидроксидните киселини или БХА (BHA). Во чиста состојба, оваа состојка е еден вид на кристален бел прав кој е потешко растворлив во вода, а подобро растворлив во алкохол или масло.

Салицилната киселина има големо ексфолирачко дејство и најчесто во козметички цели се користи во третманите како хемиски пилинг.  Секако, се употребува и за подготовка на тоници, серуми или креми наменети за проблематична кожа (на пример акни или темни флеки).

Зошто е толку ефикасна и како всушност делува врз кожата?

Салицилната киселина има кератолитично влијание, односно го разградува најгорниот слој на клетки и кератинот. Нејзината молекула го “крши“ протеинскиот ланец на кератинот кој е присутен во поголема количина во најгорниот слој на кожата, меѓутоа со оглед на тоа што нема никакво влијание врз другите протеини, оваа киселина го разградува само површинскиот слој на клетки врз кожата и е добро толерирана од клетките под нив. Новите кератиноцити се посиромашни со меланински пигмент и токму затоа кожата изгледа поубава, посјајна и покомпактна.

Салицилната киселина исто така го зголемува производството на колаген со што кожата е поеластична и поздрава, а и ја намалува видливоста на темните флеки врз кожата. Оваа состојка има и големо антибактериско дејство и не само што ги “отпушува порите“ ако може така да се изразам (го отстранува оксидираниот дел од црнките на лицето), туку го намалува дејството на бактериите и воспалинието врз кожата. Токму затоа е одлична кога станува збор за проблематична кожа со акни и митесери.

Освен во случај на акни, оваа состојка одлично помага при проблеми со флеки на кожата, мелазма, како и проблеми со првут на косата.

Во колкав процент најчесто се користи во козметиката?

Салицилната киселина може да се најде во чиста форма или како течност која е веќе растворена (во зависност од тоа од каде ќе ја купите). Не сум сигурна дали во Македонија може да се најде во аптеките како состојка, меѓутоа во другите земји на пример Италија ја продаваат.

Во чиста форма (како прав) оваа состојка во козметиката има две функции и тоа: како конзерванс и како активна состојка.

Како конзерванс салицилната киселина се користи не повеќе од 0,5% и тоа во комбинација со други конзерванси. Доколку се стави како сама производот ќе ви трае до два месеци, не повеќе. Ова секако се должи на антибактериското влијание кое го има самата состојка.

Како активна состојка во козметичките производи се користи најчесто од 0,5% до 2% во серуми или креми на пример.

За да може да се користи во козметиката, потребно е претходно правот да се раствори. Најлесно се раствора во алкохол или масло, а потешко во вода (потребно е многу, ама навистина многу трпение).

Има и една варијанта на раствор на салицилна киселина каде процентот на употреба е поголем со оглед на тоа што не станува збор за чиста состојка.

Како да го избереме вистинскиот производ со салицилна киселина и како се нанесува?

Колкава ќе биде фукционалноста на еден козметички производ кој содржи салицилна киселина зависи пред сѐ од процентот на истата во самиот производ и потоа од пх вредноста на самиот производ. Обично базна пх вредност не и дозволува на салицилната киселина да прави ексфолијација и затоа за да функционира потребно е производот да има пониска пх вредност, да речеме помеѓу 4 и 4,5. Правејќи пилинг на кожата (напоменавме дека го отстранува најгорниот слој на самата кожа), салицилната киселина и овозможува на кожата полесно да ги апсорбира другите активни состојки во производот, на пример оние со хидратантно дејство врз кожата. Токму затоа најдобро е доколку во кремот е присутен добар процент на хијалуронска киселина која ја оддржува правилната хидратација на кожата, или пак витамини на пример витамин Ц (секако во стабилна форма).

Ова ви го кажувам од искуство на моите професори, меѓутоа и од лично искуство. Јас направив крем за лице со 1,5% салицилна киселина. Во самиот крем ставив масла богати со витамин Ц (секако без да ги загревам, на ладно) и поголем процент на хијалуронска киселина, токму поради големото хидратантно и анти ајџ влијание врз кожата. Пх вредноста за почеток ја доведов на 4,5 (4 ми беше премногу со оглед на тоа што обично користам 5,5). Овој крем го тестирам врз себе и она што може да ви го кажам уште при првите апликации е дека кожата се матира во секунда (барем според мојата формула). Дава неверојатен мат ефект благодарение на сите масла и сооднос на масла со останатите состојки, нахранета и хидрирана. Исто така кожата е многу посјајна и посвежа од обично.

Јас она што би ви го препорачала лично (поврзано со употребата на овој вид на производи) доколку немате дерматолог или пак на производот не е нагласено како да се користи (иако секогаш мора да е нагласено) е да започнете постепено. Првата недела може двапати неделно навечер, втората недела една вечер да една не, и третата недела секоја вечер. Во останатите денови кога не го нанесувате производот може да користите хидратантен крем наменет за вашиот тип на кожа. Наутро може да користите хидратантен крем или серум на база на хијалуронска киселина.

Многу е важно да напоменам дека за време на третманот со салицилна киселина (кој обично се прави од октомври до февруари) никако да не се изложувате на сонце. Оваа состојка со оглед на тоа што прави пилинг и го разградува горниот слој на кожата, ја прави самата кожа чувствителна на УВ зраците. Доколку сте на место каде има повеќе сонце во тој случај обавезно користете креми со висок заштитен фактор на пример 50.

Драги мои, се надевам дека оваа статија ви се допадна и дека ви беше од корист.

Ние се читаме наскоро, а јас дотогаш ве поздравувам и гушкам.
Вики