Производи за летна нега на телото од Planeta Organica

Здраво драги мои,

обично во прашањата кои секојдневно ми ги испраќате ме прашувате за убави производи со пониска цена (обично под 500 мкд.) кои имаат убава декларација, не се агресивни и притоа убаво мирисаат. Епа драги мои токму затоа, во денешнава статија би сакала да ви претставам два прекрасни производи кои ги тестирав во последниов период и кои навистина ме воодушевија, односно гелот за туширање и кремот за нега на кожата на телото од марката Planeta Organica.

1. Гел за туширање со органска цреша и домат

Станува збор за еден прекрасен производ со одлично избалансирана декларација и микс на сурфактанти, со извонреден мирис на цреша. Верувајте мирисот е толку прекрасен што ќе ви доаѓа да го изедете производот, а вашата бања ќе мириса на овошна градина. Она што многу ми се допаѓа (освен прекрасната формула која подона ќе ја разгледаме) е пакувањето и цената: овој производ доаѓа во пакување од пола литар за само 350 мкд. Аје да ја разгледаме декларацијата

Ingredients: Aqua, Sodium Coco-Sulfate, Lauryl Glucoside, Cocamidopropyl Betaine, Sodium Chloride, Sapindus Trifoliatus Fruit Extract, Malpighia Punicifolia Fruit Extract*, Centaurea Cyanus Flower Water*, Solanum Lycopersicum Leaf Extract*, Euterpe Oleracea Fruit Extract*, Maltodextrin, Coco-Glucoside, Glyceryl Oleate, Styrene/Acrylates Copolymer, Glycerin, Citric Acid, Benzyl Alcohol, Benzoic Acid, Sorbic Acid, Sodium Benzoate, Potassium Sorbate, Dehydroacetic Acid, Parfum, CI15985, CI19140, CI42090, CI14720, CI16035. 

(*) Issued from organic agriculture.
(**) Natural Component of essential oils.
(WH) Wild Harvested Siberian plants organic extracts.
(PS) Siberian Pine Oil Derivative.

Комбинацијата на сурфактанти е одлична: по содиум коко сулфатот кој е главен сурфактант може да забележиме лаурил глукозид кој е еден од најнежните и ја ублажува измивачката моќ на примарниот. Потоа има бетаин кој ја подобрува пенливоста на производот и на крај (подолу во декларацијата) миксот на коко глукозид и глицерил олеате. Од ова досега може да заклучиме дека формулата не е воопшто агресивна. Ајде да видиме како е збогатена истата формула од аспект на екстракти, масла итн.

Започнувам со Sapindus Trifoliatus Fruit Extract кој е еден вид на сапунифицирана билка (наречена уште сапонарија/сапиндус или пак бразилска јатка) која има моќ на сурфактант, односно природен измивач (нешто слично како глината расул). Потоа може да забележиме екстракт од домат, екстракт од цреша и екстракт од акаи кои се богати со витамини и минерали и имаат хидртантно и затегнувачко дејство врз кожата. Исто така содржи и хидролат од пченкарен цвет Centaurea Cyanus Flower Water кој има ленитивно, антивоспалително и омекнувачко дејство врз кожата.

По миењето, ја остава кожата, мека, хидрирана и нежна. Подготвена за вториот производ кој ќе ви го претставам, односно кремот за нега од истава марка.

2. Крем (суфле) за нега на кожата со малина

После црешата, нормално во иста тема продолжуваме со малината. Овој производ има толку лесна и убава структура. Кожата веднаш го впива, не остава масна трага и според мене повеќе е наменет за оние кои имаат од нормална до помасна кожа на телото. Не би го препорачала за сува кожа бидејќи иако има огромно хидратантно дејство (што е одлично за претстојниот летен период кога немаме потреба од тешки производи), сепак нема голема хранлива моќ од која што има потреба многу сувата кожа. Меѓутоа, доколку имате нормална кожа на телото, која летно време многу брзо се поти и потребен ви е еден производ кој одлично ќе хидрира, ќе дава чувство на свежина без да ја поти или масти кожата, тогаш овој производ е идеален за вас.

Кога за првпат го отворив кутичето се потсетив на детството. Ви текнува на мирисот на мастиките за џвакање чунга лунга кои сите сме ги пробале како деца? Епа драги мои, овој производ мириса токму така. Многу слатко и неодоливо. Доаѓа во пакување од 360 мл. по цена од 440 мкд.

Ајде да ја разгледаме декларацијата на истиот.

Ingredients: Aqua, Helianthus Annuus Seed Oil, Glycerin, Coco Caprylate/Caprate, Hectorite, Rubus Idaeus Leaf Extract*, Prunus Amygdalus Dulcis Oil*, Vanilla Planifolia Fruit Extract*, Fragaria Vesca Fruit Extract*, Tocopheryl Acetate, Xanthan Gum, Citric Acid, Benzyl Alcohol, Ethylhexylglycerin, Sodium Benzoate, Potassium Sorbate, Parfum, CI 14720.

(*) Issued from organic agriculture.
(**) Natural Component of essential oils.
(WH) Wild Harvested Siberian plants organic extracts.
(PS) Siberian Pine Oil Derivative.

Базата е многу едноставна: по водата има сончогледово масло, потоа глицерин и коко каприлат. Сончогледовото масло е лесно масло многу богато со вит. Е кое во комбинација со коко каприлатот кое е уште полесно масло даваат производ кој како база не е воопшто масен и лесно се впива (токму затоа и реков дека не го препорачувам доколку имате сува ли многу сува кожа). Има додаток и на бадемово масло кое е за нијанса потешко со цел да се добие еден микс на мсала кои ќе направат производот да биде комплетен. Количината на бадемовото масло е многу мала во овој производ. 

Од екстракти може да забележиме екстракт од малина, екстракт од ванила и екстракт од дива јагода. Потоа има и токоферил ацетат, една варијанта на вит. Е кој во случајов е масло кое има емолиентно (омекнувачко) дејство врз кожата (не претставува антиоксиданс бидејќи не е во неговата основна форма - токоферол). Најверојатно ставиле токоферил ацетат, бидејќи базата е сончогледово масло кое е природно богато со вит. Е. 

Ете толку, завршивме со декларацијата, кратка декларација убаво формулирана за еден производ од овој вид кој за цел има да хидрира и да не ја масти кожата. Еве ја структурата на производот

Со оглед на тоа што веќе сме навлезени во јуни месец, а со самото тоа и во летниот период, сметам дека овие два производи ќе бидат идеални за летниот период со оглед на тоа што секојдневно се тушираме и имаме потреба од производ кој ќе хидрира а нема додатно да ја масти или отежнува кожата.

Повторувам, доколку имате многу сува кожа, во тој случај гелот за туширање слободно користете го, меѓутоа одберете некој друг похранлив крем за нега на кожата на телото.

Овие два производи може да ги нарачате на сајтот на bellina.mk

Јас се надевам дека оваа статија ви се допадна и ви беше од корист.

Поздрав и бидете ми добро

Вики